louyui.trading

WordPress嘅第一篇書評，興奮！

目標係寫到100篇！

OUTPUT呢本書俾我最大嘅得着係：一定要輸出（OUTPUT）！「一個星期內要將一個學習到嘅知識重溫三次」，確實啲講係「輸出三次」，先至會有所得著！無論你係寫出嚟、講出嚟、甚至乎係錄音筆記，最緊要係做到輸出！

作者建議輸出與輸入嘅比例係7:3。其實我唔係好理解到或者點分做7:3。可能係指用嘅時間？睇十本書就寫三本？或者對我嚟講，總之就係寫！

佢舉一個例子比較兩個人係讀書📚上嘅得著：

小明睇3本書，但3本都講得出佢講嘅內容；而大門係睇咗10本書，但你問返佢嗰10本書講緊乜，佢就唔太答得出，證明輸出嘅重要性

呢個Blog嘅誕生好大程度上，都係因為呢本書，鼓勵我寫多啲講多啲分享多啲

作者提及腦神經入邊有個器官叫「海馬迴」，只要你喺1個星期內運用到佢3次，海馬迴就會將你嘅短期記憶轉為長期記憶，因為佢就定義咗輸出三次嘅重要性

呢本書係實用嘅！作者唔單單係講道理，佢提出埋佢自己嘅方法去實行佢講嘅嘢。譬如自我介紹要點做、寫計劃書要點做、甚至乎寫書要點做等等。。。

重點係要將呢啲事都碎片化，將零零碎碎嘅脈絡去組合成成品。用寫書嚟做例子，首先寫低兩個主題，之後再將唔同嘅小標題寫出嚟，再將呢啲小標題套用入主題。如果有啲小標題放唔到入主題，就要諗一個新主題出嚟再套佢哋入去。一步一步去完成✅！

睇呢本書嘅緣起係來自聽podcasts說書，之後喺圖書館度借實物。由於佢嘅編撰關係別出心裁，我繼而買咗Kobo電子版去讀，每次每次小讀都有新睇法，新方向，新鼓勵。

推薦度10/10分

再讀度10/10分